Sigríður Kristín Jónsdóttir fæddist í Minna-Garði í Mýrahreppi í Dýrafirði 5. október 1917.

Hún lést á sjúkrahúsinu á Selfossi 17. febrúar síðastliðinn. Foreldrar hennar voru Jón bóndi Ólafsson frá Hólum í Þingeyrarhreppi og Ágústa Guðmundsdóttir frá Brekku, einnig í Þingeyrarhreppi.

Sigríður Kristín Jónsdóttir fæddist í Minna-Garði í Mýrahreppi í Dýrafirði 5. október 1917. Hún lést á sjúkrahúsinu á Selfossi 17. febrúar síðastliðinn. Foreldrar hennar voru Jón bóndi Ólafsson frá Hólum í Þingeyrarhreppi og Ágústa Guðmundsdóttir frá Brekku, einnig í Þingeyrarhreppi. Systkini Kristínar, þau er náðu fullorðinsárum, fæddust öll á Gemlufalli í Mýrahreppi, Jónína, gift Pétri Sigurjónssyni húsasmiði í Reykjavík, Elín, gift Oddi Andréssyni bónda á Hálsi í Kjós, Ingibjörg, gift Gísla Andréssyni á Hálsi í Kjós, og Guðmundur húsasmiður, kvæntur Steinunni Jónsdóttur kaupmanni á Flateyri. Yngri systurnar lifa Kristínu en Guðmundur lést 1983. Fóstursystkin Sigríðar Kristínar voru Ragnheiður Stefánsdóttir, d. 1985, gift Steinþóri Árnasyni, sjómanni frá Brekku er féll í árásinni á Fróða, og Skúli Sigurðsson, kvæntur Ragnheiði Jónsdóttur frá Holti, núverandi bóndi á Gemlufalli. Sigríður Kristín ólst upp á Gemlufalli, ferjustaðnum vestur yfir Dýrafjörð, réð bátum til hlunns með föður sínum, elti lömbin inn hlíð eða dal, sótti barnaskóla á Lambahlaði, tók af lífi og sál þátt í blómlegu félags- og menningarlífi sveitarinnar, sveitar sr. Sigtryggs, Kristins á Núpi, Björns skólastjóra og fjölda annarra allt frá Lambadal út til Sæbóls á Ingjaldssandi. Kristín gekk í Núpsskóla þar sem hún kynntist arftaka sr. Sigtryggs, sr. Eiríki Júlíusi Eiríkssyni frá Eyrarbakka, sem síðar varð einnig skólastjóri á Núpi um 18 ára skeið. Þau giftust 6. nóv. 1938. Húsmæðranám stundaði Kristín í Kvennaskólanum í Reykjavík en búskap sinn hófu þau í nýju prestshúsi á Núpi 1940 og þá fæddist fyrsti sonurinn, Aðalsteinn, síðar skólameistari Kvennaskólans, kvæntur Guðrúnu Larsen jarðfræðingi. Átta börn til viðbótar eignuðust þau á Núpi, Guðmund, f. 1943, d. 1946, Jón, f. 1944, dr. í jarðfræði við HÍ, kvæntur Sjöfn Kristjánsdóttur handritaverði, Hildur, f. 1947, skrifstofumaður á Sjúkrahúsi Reykjavíkur, í sambúð með Hreggviði Heiðarssyni framkvæmdastjóra frá Hornafirði, Ágústa, f. 1948, hjúkrunarfræðingur á Sauðárkróki, gift Snorra Birni Sigurðssyni bæjarstjóra, Jónína, f. 1952, kennari á Kleppjárnsreykjum, gift Guðlaugi Óskarssyni skólastjóra, Magnús f. 1953, véltæknifræðingur í Reykjavík, kvæntur Ástþóru Kristinsdóttur ljósmóður, Guðmundur, f. 1954, byggingatæknifræðingur í Borgarnesi, kvæntur Dagmar Hrönn Guðnadóttur, og Ásmundur, f. 1959, verkfræðingur í Reykjavík, ókvæntur. Árið 1960 fluttu þau hjón suður til Þingvalla þar sem sr. Eiríkur gerðist þjóðgarðsvörður með prestsskap sínum og hér syðra fæddust 10. og 11. barnið: Aldís, f. 1960, kennari á Kleppjárnsreykjum, þar sem hún býr með Jóni Kristleifssyni ökukennara, og Ingveldur, f. 1965, kennari á Ljósafossi, gift Páli Skaftasyni sjómanni. Barna- og barnabarnabörn þeirra Kristínar og Eiríks eru nú orðin 27. Á Þingvöllum voru þau Kristín uns sr. Eiríkur lét af störfum fyrir aldurs sakir og fluttu á æskuslóðir hans í Flóanum, nánar tiltekið á Hörðuvelli 2 á Selfossi. Á afmælisdegi Kristínar 1984 gáfu þau hjónin Héraðs- og bæjarbókasafninu á Selfossi bókasafn sitt, mikið að vöxtum, ákveðið tákn ævistarfs þeirra og hugsjóna. Sr. Eiríkur lést 11. janúar 1987. Eftir fráfall sr. Eiríks dvaldi Kristín nokkrar vikur á ári hjá dætrum sínum en hélt annars sitt hús á Heimahaga 8 með yngsta syni sínum, Ásmundi. Árið 1994 var Kristín sæmd heiðursmerki fálkaorðunnar fyrir húsmóðurstörf sín um dagana. Útför Kristínar verður gerð frá Selfosskirkju, í dag og hefst athöfnin klukkan 13.30. Jarðsett verður í kirkjugarðinum á Eyrarbakka.